Réfléchi sé on krèy poèm ki k’ay men an men épi Soufriyè A Santiman. Dayè sé entrigasyon a chak chapit a woman-lasa ki bouré pwennbik a makè-la pilwen an kabèch a-y. Poèm a Réfléchi tin istil a-y, moul a-y, jé a-y, anbyans a-y an jan a-y pou larélé mo a-y ki asi lanmou, ki asi vérité a lavi, é ki asi lèdmannyè ban-nou…

Toupatou twa-twa
Men anbout a ti souf
A van ki k’alé
Rété on dènyé ti flè
Toupré solèy a bwa
Awè an kontan santi-y
Awi an kontan di-y
Hak pa’a f ’an pè
An byen kontan lavi
Pé ba on nonm on kè.